संत रोहिदास नगर येथे महिला संवाद मेळावा ; आ.नमिता मुंदडा यांचे महिलांनी केले पारंपरिक पद्धतीने औक्षण

अंबाजोगाई (प्रतिनिधी)
भाजपा, शिवसेना, राष्ट्रवादी काँग्रेस, आरपीआय, एसआरपी व इतर मित्र पक्ष महायुतीच्या अधिकृत उमेदवार आ.नमिता अक्षय मुंदडा यांनी गुरूवारी पुन्हा एकदा आपला संवाद, जनसंपर्क कायम ठेवला. अंबाजोगाई शहरातील संत रोहिदास नगर येथे महिला संवाद मेळावा आयोजित करण्यात आला होता. आ.नमिताताई यांनी दीपावली सणानिमित्त सर्व जनतेला शुभेच्छा दिल्या. यावेळी आ.नमिता मुंदडा यांचे उपस्थित महिला भगिनींनी पारंपरिक पद्धतीने औक्षण केले. तसेच विधानसभा निवडणुकीच्या पार्श्वभूमीवर महिलांशी विविध विषयावर सकारात्मक चर्चा ही केली. तसेच दीपावली सणानिमित्त शुभेच्छा दिल्या.

आशीर्वाद जनतेचा आणि वसा केज विधानसभेच्या प्रगतीचा हे ब्रीद घेऊन आम्ही सातत्यपूर्ण काम करीत आहोत. भारतीय जनता पार्टी, शिवसेना, राष्ट्रवादी काँग्रेस पार्टी, आरपीआय (ए), एसआरपी व इतर मित्र पक्ष महायुतीच्या २३२ केज विधानसभेच्या अधिकृत उमेदवार म्हणून मी, नमिता अक्षय मुंदडा केज विधानसभेतील जनतेच्या आशीर्वादाने पुन्हा एकदा निवडणूक लढवित आहे. आपण सदिच्छा, शुभेच्छा व आशिर्वाद द्या अशी साद आ.मुंदडा यांनी उपस्थितांना घातली. खरे तर भाजप – महायुती तर्फे केज विधानसभा मतदारसंघासाठी उमेदवारी अर्ज दाखल केल्यानंतर दीपावली सणाच्या पार्श्वभूमीवर आ.नमिता अक्षय मुंदडा यांनी गुरूवारी अंबाजोगाई शहर व परिसरातील नागरिकांच्या भेटी गाठी घेतल्या, त्यांच्याशी संवाद ही साधला. यावेळी संत रोहिदास नगर येथे महिला संवाद मेळावा आयोजित करण्यात आला होता. यावेळी उपस्थित महिला भगिनींशी संवाद साधताना आ.नमिता मुंदडा यांनी सांगितले की, मागील पाच वर्षांत आम्ही जनतेसाठी पूर्ण वेळ उपलब्ध राहिलो आहोत. या काळात आमचे मार्गदर्शक काकाजी, अक्षयजी व मी आम्ही संपूर्ण कुटुंबियांनी आपल्या सर्वांच्या सहकार्याने केज विधानसभा मतदारसंघातील जनतेची तत्परतेने सेवा केली. केजच्या जनतेने २०१९ मध्ये मला सर्वप्रथम आमदार केले त्यानंतर मी व मुंदडा कुटुंबियांनी आपल्या सर्वांच्या सहकार्याने व आशिर्वादाने विकास कामे करून जनसेवा करण्याचा प्रामाणिक प्रयत्न केला आहे. हे आपणा सर्वांना ठाऊक आहे. बघता बघता पाच वर्षे संपली आहेत. आम्ही पुन्हा एकदा नव्याने निवडणुकीच्या परीक्षेसाठी सज्ज झालो आहोत. आम्हाला विश्वास आहे. की, जनता आम्हाला पुन्हा एकदा पाच वर्षांसाठी निवडून देईल. सर्वांना सोबत घेऊन काम करीत असताना सगळ्या समाजाला न्याय मिळाला पाहिजे अशी आमची सुरूवातीपासूनची भूमिका आजही कायम आहे. जनता आम्ही केलेल्या विकासकामांना समोर ठेवून नक्कीच आम्हाला मतदानरूपी आशिर्वाद देतील अशी खात्री आहे. आम्ही महायुती म्हणून सर्व घटक पक्षांना सोबत घेऊन या निवडणुकीला सामोरे जाणार आहोत. विकास हाच आमचा मुख्य मुद्दा, प्रमुख अजेंडा आहे. आम्ही मुंदडा कुटुंबियांनी जनतेशी पाच वर्षांत सातत्यपूर्ण जनसंपर्क ठेवलेला आहे. मूलभूत सुविधा पुरविण्याचा प्रामाणिक प्रयत्न ही केला आहे. या पाच वर्षांत जे काम करता आले नाही. ते पुढील पाच वर्षांत करण्याचा, विषय मार्गी लावण्याचा आम्ही प्रामाणिक प्रयत्न करू असा विश्वास आमदार नमिता अक्षय मुंदडा यांनी संत रोहिदास नगर येथे व्यक्त केला. यावेळी त्यांनी आयोजित केलेल्या महिला संवाद मेळाव्यास चर्चा केली, महिलांची मते जाणून घेतली. प्रारंभी संत रोहिदास महाराजांच्या प्रतिमेचे पूजन केले व त्यानंतर उपस्थित महिला भगिनींनी आमदार नमिताताई यांचे पारंपरिक पद्धतीने औक्षण करीत सहर्ष स्वागत केले. स्वागतानंतर उपस्थित महिलांशी आगामी विधानसभा निवडणुकीच्या पार्श्वभूमीवर आ.मुंदडा यांनी विविध विषयांवर चर्चा केली. याप्रसंगी परिसरातील महिला मोठ्या संख्येने उपस्थित होत्या. यावेळी त्यांच्यासोबत महायुतीतील घटक पक्षांचे नेते, पदाधिकारी व कार्यकर्ते उपस्थित होते.