मान्यवरांच्या उपस्थितीततात्या-आभई प्रतिष्ठानचे सेवा गौरव पुरस्कार प्रदान

अंबाजोगाई (प्रतिनिधी)–
अंबाजोगाई येथील तात्या-आभई प्रतिष्ठान च्या वतीने ऍड. अण्णासाहेब लोमटे यांच्या स्मृतिप्रीत्यर्थ जाहीर करण्यात आलेले सेवा गौरव पुरस्कार नुकत्याच एका शानदार कार्यक्रमात मान्यवरांना प्रदान करण्यात आले.
१० ऑक्टोबर रोजी सायंकाळी ६ वाजता नगर परिषदेच्या विलासराव देशमुख सांस्कृतिक सभागृहात आयोजित करण्यात आलेल्या एका विशेष कार्यक्रमात हे पुरस्कार आ. नमिता अक्षय मुंदडा, स्थानिक स्वराज्य संस्थेचे उपाध्यक्ष राजकिशोर मोदी, तहसीलदार विलास तरंगे, सामाजिक कार्यकर्ते दाजी साहेब लोमटे, युवा नेते बबन लोमटे यांच्या प्रमुख उपस्थितीत प्रदान करण्यात आले.
या कार्यक्रमाचे प्रास्ताविक करताना प्रतिष्ठान चे अध्यक्ष ऍड. राजेंद्रप्रसाद धायगुडे यांनी तात्या -आभई प्रतिष्ठान च्या वतीने मागील तीन वर्षांपासून विविध क्षेत्रात उल्लेखनीय कार्य करणाऱ्या व्यक्तींचा सेवा गौरव पुरस्कार देवून गौरव करण्यात येत असून यावर्षीही विधी क्षेत्रातील उल्लेखनीय कार्याबद्दल ज्येष्ठ विधिज्ञ ऍड. विठ्ठल कृष्णाजी चौसाळकर यांना विधी सेवा गौरव पुरस्कार, आरोग्य सेवेतील विशेष कार्याबद्दल डॉ. सिध्देश्वर बिराजदार यांना “आरोग्य सेवा गौरव पुरस्कार”, शिक्षण क्षेत्रातील उल्लेखनीय कार्याबद्दल प्रा. संजय प्रभाकर कुलकर्णी यांना “शिक्षण सेवा गौरव पुरस्कार”, पत्रकारिता क्षेत्रातील उल्लेखनीय कार्याबद्दल सुदर्शन रापतवार यांना “पत्रकारिता गौरव पुरस्कार” तर सामाजिक क्षेत्रातील उल्लेखनीय कार्याबद्दल ऍड. संतोष पवार यांना “समाजसेवा गौरव पुरस्कार ” प्रदान करण्यात येणार असल्याचे सांगितले. यावेळी त्यांनी विधी क्षेत्रातील त्यांचे गुरू ऍड. अण्णासाहेब लोमटे यांच्या कार्याचा गौरव केला. हा पुरस्कार प्रदान कार्यक्रम आणखी मोठ्या प्रमाणावर घेण्याचा प्रतिष्ठान चा मानस असल्याचे त्यांनी सांगितले.
या कार्यक्रमात डॉ. सिध्देश्वर बिराजदार यांनाआरोग्य सेवा गौरव पुरस्कार, प्रा. एस. पी. कुलकर्णी यांना शिक्षण सेवा गौरव पुरस्कार, ऍड. संतोष पवार यांना समाज सेवा गौरव पुरस्कार तर सुदर्शन रापतवार यांना पत्रकारिता सेवा गौरव पुरस्काराने स्मृती चिन्ह, सन्मान पत्र, शाल व श्रीफळ देऊन सन्मानित करण्यात आले.
सदरील पुरस्कार वितरण कार्यक्रमात बोलताना आ. नमिता मुंदडा, स्थानिक स्वराज्य संस्थेचे उपाध्यक्ष राजकिशोर मोदी, युवा नेते बबन लोमटे, ऋषिकेश अण्णासाहेब लोमटे यांनी ऍड. अण्णासाहेब लोमटे यांच्या स्मृतींना उजाळा देत त्यांच्या स्मृती प्रित्यर्थ ऍड. राजेंद्रप्रसाद धायगुडे हा उपक्रम राबवित असल्याबद्दल त्यांचे कौतुक केले.
या कार्यक्रमात डॉ. सिध्देश्वर बिराजदार, प्रा. एस. पी. कुलकर्णी, ऍड. संतोष पवार आणि सुदर्शन रापतवार यांनी आपली मनोगते व्यक्त केली. या कार्यक्रमाचे सूत्रसंचालन भागवत मसणे व शितल बोधले यांनी केले. या कार्यक्रमास विधी, सामाजिक, राजकीय क्षेत्रातील मान्यवर उपस्थित होते.